ഉത്ഭവവും വളർച്ചയും

എസ്.എൻ.ഡി.പി. യോഗത്തിന്റെ പതിനെട്ടാം വാർഷിക പൊതുയോഗത്തിലെ തീരുമാനപ്രകാരമാണ് സംഘടനയിൽ താലൂക്ക് യൂണിയനുകൾ സ്ഥാപിക്കുന്നത്. ഈ തീരുമാനത്തിന്റെ തുടർച്ചയായി കരുനാഗപ്പള്ളിയിൽ ആദ്യത്തെ യൂണിയൻ സ്ഥാപിതമായി. തുടർന്ന്, 1933–1935 കാലയളവിൽ യോഗം ജനറൽ സെക്രട്ടറിയായിരുന്ന സി. കേശവന്റെ നേതൃത്വത്തിലാണ് തിരുവനന്തപുരം താലൂക്ക് യൂണിയൻ നിലവിൽ വരുന്നത്. യൂണിയന് കീഴിൽ ആദ്യം രൂപീകൃതമായത് 628-ാം നമ്പർ പേരൂർക്കട ശാഖയായിരുന്നു. പിന്നീട് ആർ. ശങ്കർ ജനറൽ സെക്രട്ടറിയായ കാലഘട്ടത്തിൽ തിരുവനന്തപുരം യൂണിയന്റെ പരിധിയിൽ ശാഖകളുടെ എണ്ണം ഒൻപതായി ഉയർന്നു.

ആദ്യകാല നേതൃത്വവും മാറ്റങ്ങളും

ഈഴവ സമുദായത്തിൽ നിന്നുള്ള ആദ്യത്തെ പി.എസ്.സി. അംഗമായ മുരുക്കുംപുഴ കുഞ്ഞുകൃഷ്ണൻ വക്കീലായിരുന്നു തിരുവനന്തപുരം യൂണിയന്റെ പ്രഥമ പ്രസിഡന്റ്. നന്തൻകോട് ഭാസ്കരൻ ആദ്യ സെക്രട്ടറിയായും പ്രവർത്തിച്ചു. പിന്നീട് മുരുക്കുംപുഴ കുഞ്ഞുകൃഷ്ണന് സർക്കാർ സർവീസിൽ ജോലി ലഭിച്ചതിനെ തുടർന്ന് പുതിയ ഭരണസമിതി രൂപീകരിക്കുകയും അഡ്വ. രാഘവൻ പ്രസിഡന്റായി ചുമതലയേൽക്കുകയും ചെയ്തു. 1950-ലെ വാർഷിക പൊതുയോഗത്തിൽ സി. ചക്രപാണി പ്രസിഡന്റായും രാഘവൻ സെക്രട്ടറിയായും തിരഞ്ഞെടുക്കപ്പെട്ടു.

പ്രതിസന്ധികളും പുനരുദ്ധാരണവും

ഇടക്കാലത്ത് വന്ന ഭരണസമിതികളുടെ പ്രവർത്തനമില്ലായ്മ കാരണം യൂണിയന്റെ പ്രവർത്തനം മന്ദഗതിയിലായി. ഇതോടെ ശാഖാ പ്രവർത്തനങ്ങൾ ശക്തിപ്പെടുത്തണമെന്ന ആവശ്യവുമായി പ്രവർത്തകർ അന്നത്തെ യോഗം ജനറൽ സെക്രട്ടറി പ്രൊഫ. പി.എസ്. വേലായുധൻ മാസ്റ്റർക്ക് നിവേദനം നൽകി. ഇതിനെത്തുടർന്ന് യൂണിയൻ ഭരണസമിതി പിരിച്ചുവിടുകയും, പ്രവർത്തനങ്ങൾ ഏകോപിപ്പിക്കാൻ അഡ്വ. മുരുക്കുംപുഴ രാഘവൻ, പേട്ടയിൽ പി. ഭാസുരാംഗൻ, വി. ബാബുകുമാർ എന്നിവരെ അഡ്മിനിസ്ട്രേറ്റർമാരായി നിയോഗിക്കുകയും ചെയ്തു.

ഈ അഡ്മിനിസ്ട്രേറ്റീവ് കമ്മിറ്റിയുടെ നേതൃത്വത്തിൽ 1978-ൽ വാർഷിക പൊതുയോഗം വിളിച്ചുചേർത്തു. ഈ യോഗത്തിൽ ഡോ. എം.കെ. ശ്രീധരൻ പ്രസിഡന്റായും വി. ബാബുകുമാർ സെക്രട്ടറിയായും തിരഞ്ഞെടുക്കപ്പെട്ടു. എസ്.എൻ.ഡി.പി. യോഗത്തിന്റെ പ്ലാറ്റിനം ജൂബിലി ആഘോഷങ്ങളോട് അനുബന്ധിച്ച് കടന്നുപോയ ഈ കാലയളവിലാണ് നിശ്ചലമായിരുന്ന നിരവധി ശാഖകൾ പുനരുജ്ജീവിപ്പിക്കാനും തിരുവനന്തപുരം യൂണിയന്റെ പ്രവർത്തനം കൂടുതൽ കരുത്തുറ്റതാക്കാനും പുതിയ സമിതിക്ക് സാധിച്ചത്.

ജില്ല: തിരുവനന്തപുരം  

താലൂക്ക്: തിരുവനന്തപുരം  

യൂണിയൻ ആസ്ഥാന വിലാസം: എസ്.എൻ.ഡി.പി. യൂണിയൻ ഓഫീസ്, ജി.പി.ഒ. ജംഗ്ഷൻ, പുളിമൂട് പി.ഒ., തിരുവനന്തപുരം  

ഫോൺ നമ്പർ: 0471-2478563  

നിലവിലെ ഭരണം: 

വനിതാസംഘം ഭാരവാഹികൾ: 

മൊത്തം ശാഖകൾ: 76  

ക്ഷേത്രങ്ങൾ: 6  

ഗുരുമന്ദിരങ്ങൾ: 12  

സ്‌കൂളുകൾ: ഇല്ല